عايزة تبقي فعّالة طول اليوم؟ يبقى لازم تعملي الـ4 حركات دي!

شاركيها أصحابك!
Share On Facebook
Share On Twitter
Share On Google Plus
Share On Pinterest

إزاي تقدري تبقى فعالة ومنتجة طول اليوم في عالم كل حاجة فيه بتطالبك تنجزي وتحققي حاجة، وفي نفس الوقت متنهاريش؟

أول حاجة بس نفرّق بين كونك ” مشغولة ” وكونك ” فعّالة “. ودا بيقتضي إنك تحطّي في ذهنك حاجة واحدة، ركزي عليها وحطي فيها مجهودك وحققيها، وبعدين إنتقلي للي بعدها. لأنه برغم إن الـ Multi-tasking بيبان من برّا إنه باعث على الإنجازية وتحقيق الأهداف، لكن في الواقع هو عبارة عن ملحمة تشتيت ذهني وبدني ونفسي كمان.

لو عندك 100% مجهود، واستثمرتيه ببساط في حاجة واحدة، فهي هتتعمل أسرع + أفضل! (ودا المهم، صح؟)، ومش بعيد يتبقى لك مجهود وصحة تعملي حاجات جديدة تانية، أو حتى طاقتك تتجدّد وتحسّي بحماس إنك تنجزي أكتر.

أما لو عندك 100% مجهود، واستثمرتيه في 3 حاجات مثلًا، فغالبًا مجهودك هيتقسّم بنسبة 33.3% لكل واحدة، وهتلاقي في آخر اليوم إنك مأنجزتيش حاجة او لو أنجزتِ هتبقى طاقتك كلها خلصانة وهتنامي مننا في السكة. 😀

فيه 4 خطوات عشان تكوني فعّالة أو أكثر فعالية (حسب حالتك الشخصية) في يومك.

كوني أكثر فعالية

1) حددي أولوياتك:

أول ما تحسّي إنك بتسرحي وبتشتّتي نفسك، أسهل حاجة تعمليها هو إنك تعدّي على صوابعك 3 حاجات:

  1. أنا إيه أولوياتي؟
    مثلًا: أخلص الشابتر دا، أروق عشان الضيوف جايين، اعمل التاسك الفلاني، اتمرّن، أذاكر مع أولادي، إلخ..
    مهم جدًا تبقي عارفة أولوياتك واللي مهم تنجزيه في الوقت الحالي، ودا هيكون كويس عشان تعرفي إن التشتيت مش حل كويس، أو بالأحرى: مش حل أصلًا!
  2. خدي نفس عميق 😀
    ريلاكس، مفيش حاجة تستاهل التوتر والقلق، هتعرفي تظبُطي الأداء اطمّني. دي مش نهاية العالم.
    كمان ساعة أو ساعتين – لو ركّزتي – هتكوني إمّا بدأتِ أو – فلنأمل يعني – قرّبتِ تخلصي.
  3. اختاري صحّ
    بإيديكِ دلوقتي إختيار إما أنك تقومي تعملي حاجة مركّزة عليها كويس، أو تشتّتِ نفسك بإنك تعملي حاجة مختلفة.

خلي بالك: لو إنتِ مقنعة نفسك إن الـ Multi-tasking هيساعدك تبقي مُنجزة أكتر، فـإنطلقي.
بس بردو خليكِ عارفة إنك لو عايزة تبقي مُنجزة تنين، فركّزي على حاجة واحدة 😀

مواضيع تهمّك || إدارة الوقت: 15 طريقة سهلة عشان تنجزي أكتر في وقت أقل.

2) حددي “إحساس” يومك:

بعيدًا عن المعطيات المادية، فالمعطيات النفسية والعاطفية والذهنية بتلعب دور الحصان العربي في نمط سريان يومك.
لازم يكون عندك وعي – awareness بنفسك:

  1. أنا حاسة بإيه؟
    قلقانة، متضايقة من فلانة، جسمي واجعني، حاسة بصداع.. إلخ.
    علمًا بإن عليكِ إنك تستبعدي الشعور الناتج من عدم إتمامك للمهمة زي القلق من عدم الإنجاز أو الخوف من التأخير أو من النتيجة أو شعور بالتعجُّل. لأن دا هيبقى حرفيًا زي “الجاثوم” على نَفَسك. لازم تبقي هادية ومركّزة – ع الأقل بالقدر الطبيعي – عشان تقدري تدوّري العجلة.
  2. بتفكري في إيه؟
    مثلًا فيه حاجة أكبر من المهمة اللي وراكِ شاغلاكِ، زي مشكلة ما أو فكرة أو أسئلة واخدة شطر كبير من ذهنك وتركيزك.
  3. تقدري تعملي إيه بخصوص الأفكار والمشاعر دي؟
    أنشطة (إيجابية طبعًا) معينة لو عملتيها هتنزع الأفكار والأحاسيس دي أو تنحّيها أو تعلّي من تركيزك، زي الرياضة، الرقص، الطبخ، الكلام مع صاحبتك، قيلولة..إلخ.

وعيك بالأتوموسفير بتاع عقلك وجسمك وإحساسك هو أمر ضروري جدًا عشان تقدري تنفّذي أو تحقّقي حاجة، لأن ممكن عناصر منهم تكون سبب في منعك من إتمام المهمة على أكمل وجه.

مواضيع تهمّك || 7 حاجات عشان تحققي السعادة في حياتك!

3) التكنولجيا حليفك:

كوني أكثر فعالية

من باب إن التكنولجيا متحكّمة تقريبًا في 80% من حياتنا، فهيكون أمر حسن لو استخدمتيها في ترتيبها.

لحسن الحظ إن فيه ما لا يُحصى من تطبيقات هواتف وحواسيب شخصية عشان تساعدك تبقي على الصراط المستقيم، خاصةً لو وراكِ مسؤوليات كتيرة زي البيت والأولاد أو الشغل أو الدراسة أو غيره.

استخدمي المنبّه في تحديد وقت لعمل مهمة معينة عشان متلاقيش نفسك قضيتِ شبابك كله بتذاكري أو بتحضّري الغدا للضيوف أو بتعملي تاسك.

مواضيع تهمّك || إتخلصي من أي عادة سيئة في 4 خطوات فقط!

4) الفواصل حلوة!

إنك تعملي refresh لعقلك عشان يفضل مصحصح حاجة صحية تمامًا.
لأنك لو وراكِ مشروع أو مهمة أو واجب ما فمن الحسن إنك تدي لعقلك وجسمك مساحة يفصل فيها أو يتشتت – شوية صغيرين – عن الهدف الأكبر. زي تشات سريع مع حد أو تـشوفي الفيس بوك أو تعملي كوباية نسكافيه متينة.

العقل المصحصح هو عقل مركّز!

مواضيع تهمّك || تايهة؟ 6 خطوات إعرفي بيها شغفك.

الخلاصة:

إحنا هنبقى أنجح – وأسعد – في حياتنا لو سعينا للإنتاجية والإنجاز بالطريقة صح + الكمية المناسبة من التركيز والراحة.

Comments

comments

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Show Buttons
Hide Buttons
ثواني من فضلك :)

اشتركي في مجلتنا الاسبوعية :)

ضيفي إسمك وإيميلك عشان توصلك أجدد موضوعاتنا لحد عندك يا هانم ;)