أسئلة لا تسأليها لزوجك

5 أسئلة أوعي تسأليها لزوجك! (+5 أسئلة بديلة)

شاركيها أصحابك!
Share On Facebook
Share On Twitter
Share On Google Plus
Share On Pinterest

برغم إن فيه بديهيات بيبقى من الكوميديا إن الناس تنوّه لها في بداية الكلام، بس مش مشكلة، نقول تاني:
“دماغ الرجالة غير دماغ الستات. ”

ودي مُسلّمة كونية لازم نسلّم بيها عشان نعرف نعيش ونتكاثر ونموت في سلام. الرجالة – يا للعجب! – مش ستات. وليهم دماغ وعقلية وطريقة استيعاب وكلام ونمط حياة مُختلف تمامًا عن خاصتنا كنساء.

فمينفعش بأي شكل إن الإطار اللي إحنا كـ “ستات” بنشوف بيه الدنيا وبنفكّر من خلاله، نطبّقه قاطبًا على الرجالة، ونرفع الـ expectations بقى ونحلم من باب ” لو كنت مكانه كنت هجاوب بـكذا كذا”، وبعدين نتصدم بالواقع الحزين!

هو في الحقيقة مش واقع حزين ولا حاجة، هي مُجرد بس إننا بنعتمد على الفطرة بتاعتنا في التعامل والتعاطي مع الكون حوالينا، ودي بقى عين الكوارث الأرضية كلها 😀 ..

لأن بصورة عامة لكل باب مُفتاح، وبصورة خاصة شوية: لكل جنس مننا دماغه وحياته، وبصوة متخصصّة جدًا: لكل راجل مدخل.

فلازم تعرفي دماغ الرجالة عمومًا، عشان تعرفي دماغ الراجل اللي معاكِ خصوصًا.

ومن هنا، فيه 5 أسئلة لا ينبغي أبدًا ولا يصح ولا يجوز إنك تسأليهم للراجل. ليه؟ عشان لو إنتِ متوقعة إنه هيجاوبك باللي في دماغك فتحسي بعدها بالدوبامين المتدفق، تبقى واهمة يا ست هانم 😀

لأنه غالبًا .. لأ غالبًا إيه .. دا أكيد وقطعًا وحقًا مش هيبقى فاهم إيه السرّ ورا الاسئلة + هيبقى فاكرها أسئلة عادية (فغالبًا هيخبّط في الحلل، ودي حاجة إحنا مش عايزينها :D) + هتقلب خناقة.

نبدأ بسم الله..

1) هو أنا تخينة؟

دا هو السؤال المُفخخ اللي بنصرّ نسأله للرجالة، وهو عبارة عن مأزق عظيم بنحطّهم فيه تحت ضغط وتوتر فتّاك:

  • لو جاوب بـ ” آه..شكلك مكعبل ” فنهاره فل وإحتمال الجيران تيجي تسلّك لأنه مبقاش يحبك ومش شايفك حلوة وإنتِ اللي مضيعة شبابك عليه هو والبيت والعيال.
  • لو جاوب بـ ” لأ يا حبيبتي إنتِ رشيقة ” فنهاره فل بردو وإحتمال تدخّل الجيران وارد لأنه كدّاب وبياخدك على أد عقلك وبيتريق عليكِ.

وبيدخل تحت هذا التصنيف كل الاسئلة اللولبية من نوعية: ” هو أنا شكلي كبير؟ – هو أنا حلوة؟ – هو مناخيري كبيرة؟ ”

والبديل إنك تسألي الميزان، عشان guess what! لو الرقم كبير على الميزان، فغالبًا هتكوني مليانة!

 

2) إيه رأيك في السّت دي؟

أو : تفتكر ” فلانة الفلانية ” حلوة؟

  • لو جاوب بـ ” آه دي جميلة أوي ” ..ففيه إحتمالين:
    – يكون سؤالك التالي: أحلى مني؟ ..ودي هي القنبلة التانية.
    – أو تخشّي في الخناقة على طول.
  • لو جاوب بـ ” والله مش متأكد مركزتش ” فهتعرفي بالتأكيد إنه كداب، ودا هيقودنا بردو للنقطة الأولى، وكلامهما شر.

إيه الحاجة الكويسة اللي ممكن تطلعي بيها من السؤال البنّاء دا؟ وإيه هو وجهة نظرك هيكون رده؟

 

3) هو أنا أحلى واحدة في العالم بالنسبة لك؟

بجد؟ هو لازم الأزواج يشوفوا زوجاتهم أحلى ستات في العالم؟

لو كان المنطق كدا، مكنش حد إتجوز في الحياة!

وإنتِ بالسؤال دا – مع السؤال رقم 2 – بتحطّي نفسك في وضع إمتهان ذات ومقارنة مش محلها إطلاقًا. لأن كل واحدة ميزتها وجمالها ورونقها المنفرد. وإنتِ في نفسك جميلة ومميزة.

وخلينا صريحين – على الأقل مع بعض كستات – : مفيش واحدة هي أحلى واحدة في العالم، وهو لو مكنش شايفك حلوة مكنش إتجوزك. ولكل واحد نظرته عن الجمال..وشكرًا.

4) أنا وحشتك إنهاردة؟

تخيلي كدا معايا الراجل طالع عينه 8 ولا 9 ولا 10 ساعات ورا بعض بيعصر دماغه وبيتفرهد، وبيكلم دا ويتشاكل  مع دا ويروح ويجي وورق ومشاكل ودوشة ومواصلات وحر وكل تركيزه في الشغل عشان يكفّيكِ والبيت.. وهوب: ” أنا وحشتك إنهاردة؟ ”

طيب خلينا نتخيل:

هو هيجاوب بـ ” آه وحشتيني ” – حتى لو هو لأ – فكدا الراجل عداه العيب وقزح، بغض النظر بقى هو صادق فيها ولا لأ.
ومش بعيد كمان تستوثقي، فتقولي: بجد وحشتك؟ ولا بتسكتني؟ ..ودي معناها إنك فاضية وعايزة تتخانقي ببساطة، وهو هيبقى على أتم استعداد للخناق، لأن اليوم – واضح – مكنش ليلة العمر.

ليه مش لازم تسألي السؤال دا؟ لأنه بيتفرم طول اليوم عشان يرجع لك ولحضنك، وعارف إنك إن شاء الله بخير ومستنياه ومحضراله دلع كل يوم.

يبقى ظبّطي نفسك وحالك وشغلك ودنيتك، عشان لما يرجع، يكتشف إنك أد إيه كُنتِ واحشاه! 😉

 

+ سؤال تكميلي للسؤال دا : إنت بتحبني؟ – السؤال نفسه مفهوش مشكلة، لكن بيبقى مشكلة وهو راجع من الشغل أو من ضغط ما. ظبّطي التوقيت بس.

5) هو أنا لو مُت..هتتجوّز تاني؟

وفيه ستات بيُمعنوا في الشطارة: “فلانة” كويسة ومحترمة، لو مُت إتجوزها.

سبحان الله! هو إنتِ لحقتِ تحطي الخطة؟ 😀 إنك هتموتي قبليه، وإنه فيه إحتمالية يتجوز، وإنه ممكن يتجوز فلانة؟!

طيب معلش، خلينا نتكلم بالعقل (لمرة واحدة يا معشر النساء) هو مبدئيًا إحنا كلنا عارفين إنه الزواج بالنسبة للراجل مهم، وإنه حياتهم ممكن تقف بسبب عدم وجود ست، بالذات لو فيه أولاد ومحتاجين حد ياخد باله منهم.

فإنتِ بقى شاغلة بالك ليه بحاجة لسه إن شاء الله ربنا يطولك في عمرك يعني؟ وليه كمان بتخلقي خناقة من الهوا؟

مش الأولى تستمتعي بحياتكم ووجودكم سوا، ولا إيه يا هانم؟ 😉

 

طيب، كفاية ضرب بقى ونخش في الشتيمة 😀 ..أقصد الاسئلة الكويسة.ودي أسئلة هيكون رائع إنك تسأليها لزوجك، ومش هتعمل لا شحن ولا توتر ولا تنشنة بينكم، بل وبالعكس هيكون ليها عائد ومرجوع طيب بينكم:

ملحوظة: أي رد تتلقيه تاخديه بهدوء، وتجنبي الجدال، وتبسّمي وتقبّليها بضحك وفرفشة.

1) أقدر أعملك إيه يبسطك إنهاردة؟ / أدعيلك بإيه؟

2) إيه أكتر حاجة تحبني أعملهالك أو تلاقيها لما ترجع من الشغل؟

3) إيه اللي ممكن أعمله أو أساعدك بيه يخفّف من حِملك؟

4) ممكن تفكّرني بحاجة طلبت مني أعملها هتبسطك وأنا ملحقتش/ مقدرتش أعملها؟

5) نفسك أعمل لك إيه في الأجازة؟ (نفسك تقضي يوم الأجازة إزاي؟)

 

افتكري: كله بالحنية بيفُك! 😀

 

Comments

comments

شاهد أيضاً

قبل أن تفقدي الأمل:15 نصيحة مختصرة لمضاعفة إنجازك! -1

شاركيها أصحابك!وجودك هنا يعني أنك عالقة، مثلنا جميعًا، في مسؤوليات وخطط كثيرة تتراكم فوق رأسك ...

كيف تسيطر على الغضب

قبل أن تقتلي أحدًا: 15 شيئًا عليكِ فعله للسيطرة على الغضب.

شاركيها أصحابك!الغضب ليس مرضًا لحسن الحظ، وإنما حال يُمكن السيطرة عليه كأي شيء في العالم. ...

بدون نوتيلا: 6 أشياء عليكِ فعلها لتجاوز الإرهاق الذهني والنفسي بسلام.

شاركيها أصحابك!إنّا لا نحيا في الفردوس in heaven كما يحب أن يسميها الخواجات، ومعرّضون في ...

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Show Buttons
Hide Buttons
ثواني من فضلك :)

اشتركي في مجلتنا الاسبوعية :)

ضيفي إسمك وإيميلك عشان توصلك أجدد موضوعاتنا لحد عندك يا هانم ;)